Paliiwem No Kasano nga Agasan ti Ayup ti Bagina (Observe the self-healing power of animals) - a lesson in Ilocano

Dr Abe V Rotor
Reprint from Okay ka Apong: Dagiti Tawid nga Sirib ken Adal, ni Dr Abe V Rotor, Bannawag Magazine
Ammo ti aso nga agasan iti bagina. Dilpatanna iti sugatna, ket aginana a nabayag iti maysa a nalamiis a lugar. Saan a mangmangan (fasting) inggana't makaungar.
Esteria da apong nga adda dagiti ayup a maagasanda ti bagbagida.

• Dalusan dagiti aso, ugsa, baka, ken kapadada ti sugatda babaen ti panangkunnot wenno panangdilpadilpatda iti sugatda. Addaan iti natural nga antibiotioko ti katayda. Nakadidillaw met nga ipainitda dagiti sugatda. Adda met sumagmamano nga ayup kas iti baot’ talon a mangtapkal iti sugatda iti tutot ti kayo (resin/gum).

• Naipakdawyan kadagiti manok ken billit ti mangamloy kadagiti dutdotda tapno maurnos, tapno maduktalanda no adda ‘parasite’ (ulmog, kuton, kdp.) ken dadduma pay a rugit.

• Regular ti panagdigos dagiti animal ken tumatayab. Agduduma ketdi ti panagdigosda— danum, init (panagpainit, panagpabilag), pitak (nuang ken baboy a netib), ken uray tapok.

• No masugatan ti orangutan wenno gorilia, padasenna a pagsardengen ti panagdarana babaen dagiti imana. Ken kabaelanna ti agsapul iti umisu a bulbulong a pangtapalna.

• Adda met dagiti oso nga agdigos iti napudot a sulfur.

• Ti lobo a tinukkaw ti karasaen, mangtilmon iti snakeroot.

• Bayat ti panagtutudo, pakanen ti atap a pabo dagiti annakna kadagiti bulbulong dagiti pagrekado a mulmula.

• Ti aggurigor nga animal, mangbirok iti napariir, nalinong a disso iti asideg ti dan-aw ket agyan dita a siuulimek, sagpaminsan a mangan ken naynay ti yiinumna.

• Kasapulan dagiti babbai a billit ti apog (lime) iti panangbukelda iti ukis ti itlogda. Gagangay laeng ngarud no makakitatayo kadagiti taraken a billit nga agtuktuktok iti cuttlebone (tulang ti laki).

• No agsakit wenno nasugatan, gagangay nga usaren dagiti atap nga ayup ti duogan a remedio ti nakaparsuaan: agas, angin, ken naan-anay a panaginana. Naamiris daytoy ti tao ket natignay wenno nainspirar iti panangipakatna iti arte ti natural a panagagas (natural healing). Agingga iti agdama, adu a mangngagas (kaaduanna dagiti erbolario) ti mangar-aramat iti wagas dagiti ayup iti panangagasda iti bagbagida.

Toad (Bufo marinus) - maturog ti uneg ti ringgat wenno kueba bayat ti panagtikag wenno panaglamiis ti tiempo

Nakakitakayon iti burtong iti bulong? Dayta a burtong ti awaganda apong iti kanser dagiti mula.
Masansan a kapten daytoy a kanser ti bulong ti santol, gawed, dapdap, ken dadduma pay. Agpapada dagitoy a kapten ti nasao a kanser iti uray ania a bangir ti bulong. Iti uneg dagitoy a tumor, sibibiag dagiti nagbabassit a ‘parasite’. Agbiag ken umaduda. Agingga a dagiti “annakda”, umakarda iti sabsabali pay a bulong, ken uray dagiti sanga. Umadu nga umadu agingga nga agregregen dagiti bulong ti kayo, ket no awanen dagiti bulong daytoy, agbisin agingga a matay.

Daytoy ti makagapu iti panagpukaw dagiti dapdap iti adu a paset ti pagilian.
Adda met ketdi usar dagiti burtong. Mabalin a maaramid a diubos ti burtong a partuat ti

Homopterans iti sumagmamano a kita ti kaktus.
Ngem kaaduanna a makadidigra kadagiti mula ta bumassit ti maibunga wenno produksion dagitoy, wenno patayenna pay ti mismo a mula.

Pagsayaatanna, maisupadi iti pammati ti kaaduan, saan a makaapektar daytoy burtong dagiti mula kadagiti animal ken tao.—O