Sunday, July 24, 2016

Music increases growth of animals and yield of crops.

Makatulong ti musika iti panagpaadu ti dingo ken apit.
Dr Abe V Rotor


Iti maysa a ranso a nakaawisanmi idiay Batangas, ines-estoria kadakami ti dadaulo dagiti ransero ti akem ti musika iti panagpaamo kadagiti dingo.
“Masapul nga iruamtayo nga umuna dagitoy sakbay nga ipastortayo wenno pakanentayo,” intudona ti sound system a pakaipatpatokaran ti nakaim-imnas a musika.

Bayat ti panagpaspasiarmi iti nasao a ranso, nangngegko dagiti musika da Mozart, Schubert, Beethoven, ken Bach. Kaslaak la adda kadagiti nangangato a pasdek idiay Makati a pakaipatpatayaban met ti nakaim-imnas a musika tapno mapalag-an ti panagtrabaho. Mamati dagiti sientista nga agpadpada ti epekto ti musika iti tao, ken iti ayup, ken mabalin pay kadagiti mulmula.

Malagipmi la ket ngarud ti am-ammomi nga agar-aramid iti bino (wine) idiay Vienna. Isu daytoy ni Carlo Cagnozzi, liman a tawen a patpatokarenna babaen ti pipa ti musika ni Mozart iti kaubasanna. Impalgakna a naisangsangayan ti epekto daytoy ar-aramidenna kadagiti mulana. bunch of grapes photo

“Nadardarasda nga agluom,” kinuna daytoy. Innayonna pay a bumdeng nga umasideg dagiti insekto ken billit iti kaubasanna.

Agtultuloy ti panagadal dagiti sientista kadagiti kakastoy a pammati tapno mairakurak daytoy di pay unay mapatpati nga epekto ti musika kadagiti mulmula.
Maysa met nga agpolpoltri a taga-Teresa, Rizal a mamati iti music therapy ti nakapatpatangko.

“Naparpartak ti panagdakkel dagiti manok, ken ad-adu ti mayitlogda,” kinuna daytoy. “Kinapudnona, pengdan ti musika ti panagsisinnippit dagitoy.”
Kastoy met laeng ti pammati dagiti agpatpatanor iti baka.

“Basta yiladda lattan uray agngatngatingatda pay laeng,” kinuna daytoy.

No ngamin garaw a garaw dagiti animal, nalaka laeng nga agbisin dagitoy ket masayang laeng ti kinnanda a mainayon koma pay iti panaglukmegda.
Iti sabali a bangir, impakammo ti maysa a programa iti telebision a dagiti musika a rock, ad-adda a parawetenda dagiti anay, a mangipaay met iti ad-adu a pannakadadael.

Daytoy ngarud ti ballaag dagiti mangitantandudo iti music therapy: agannad kadagiti “nararasuk a musika” ta sabali met ti epektona kadagiti pakaipaayan itoy. ~

Acknowledgement: Internet photos; Bannawag Magazine Okeyka Apong by AVRotor

No comments: